مؤتمر صحفي مع يوسف النجار

النص

* يدخل يوسف النجار و هو يرتدي جاكت طويل وصندل مفتوح و غطاء للرأس ويصعد للمنصة ويتكلم في هدوء ووقار
يوسف: صباح الخير ...أنا يوسف ابن هالي وشهرتي يوسف النجار..... الناصرة بلد صغيرة جداً عشان كده أنا متأكد انكوا سمعتوا إني خاطب بنت اسمها مريم ...وأنا طلبت المؤتمر ده النهاردة عشان أرد علي الإشاعات اللي مالية الناصرة بقالها فترة......... الحاجة اللي أنا جاي أعلنها بوضوح النهاردة واللي لازم الكل يعرفوها كويس إني هتجوز مريم ....واللي يقول لكوا إني هسيبها يبقي كذاب..(يكرر في توكيد)...أنا هتجوز مريم......لو عند حضراتكوا أي أسئلة أنا علي استعداد للإجابة.

صحفي 1 : هل حضرتك تقصد بالإعلان ده إنك تنفي الإشاعة اللي بتقول إن مريم خطيبتك حامل؟؟

يوسف: لأ ...أنا منفيتش الخبر ده.

ص1 : يعني هي حامل فعلاً؟؟

يوسف: أيوه بس....

ص1 (مقاطعاً): وحضرتك محاولتش أبداً تلغي الجوازة دي؟

يوسف: بصراحة ...أنا في الأول قررت أسيبها ومأتمش الجوازة ....في هدوء ومن غير فضايح.

ص2 : بس الشريعة اليهودية واضحة في النقطة دي.... والبنت اللي تحمل من غير جواز لازم تموت.

يوسف: حضرتك غلطان .....أنا آسف إني أقولك كده بس حضرتك فعلاً غلطان.

ص2 : بنت حامل من غير جواز ....يبقي بحسب الشريعة لازم تموت ...إيه الغلط اللي أنا قلته؟؟
يوسف: الشريعة مبتقولش كده خالص.

ص2: لأ ... أنا دارس الشريعة اليهودية كويس جداً .... ومتأكد إن الزانية لازم تموت.

يوسف: أنا افتكرت زي حضرتك كده في الأول ......
ص2 : مش فاهم ....افتكرت ايه؟؟

يوسف: افتكرت إن مريم حامل من الزني.

ص2: ما هي مش متجوزة .....يبقي أكيد زانية.

يوسف: مريم قالت إن الملاك ظهر لها وأعلن لها إن روح الله القدوس هو اللي زرع الطفل ده في بطنها.

ص3: وحضرتك بقي صدقت الحكاية دي؟؟

يوسف: أيوه.

ص3: وحضرتك مش شايف إن دي سذاجة وطيبة زيادة عن اللزوم.؟

يوسف: لأ صدقني ...مش كده خالص ... لأنه ببساطة شديدة نفس الملاك ظهر لي برضه وأكد لي الكلام اللي هي قالته.

ص3 : ظهر لك أنت كمان؟؟ قبل ما يظهر لها ولا بعد ما ظهر لها؟؟

يوسف: بعد ما ظهر لها .... أنا زي ما قلت لك كنت خلاص قررت أسيبها تمشي في هدوء ومن غير شوشرة ....بس الملاك لما ظهر لي قال لي أكمل مشروع جوازي منها .... وقال كمان إن الطفل ده هيكون بركة.

ص1: نفهم من كده إن مشروع الجواز هيكمل؟؟

يوسف: نعم.

ص1: ليه ؟ محدش هيلومك لو فكيت الخطوبة بعد كل الكلام اللي سمعته عنها؟

يوسف: لأن مريم وأنا مصدقين إن الطفل ده هو المسيّا اللي احنا وكل شعبنا مستنيينه من زمان.
ص1: الحكاية دي كلها كده شكلها متلفق ومتفبرك.

يوسف: أنا متأكد من الكلام اللي أنا بقوله ....ومتأكد كمان إن الحقيقة هتظهر لكل الناس ولو بعد وقت طويل ....الملاك قال لنا نسمي الطفل "يسوع" ... والإسم دا معناه "الله المخلص" ... صدقوني الطفل ده فعلا هو المسيّا.

ص3: هل الطفل ده هو اللي هيخلص شعبنا من الخطية؟؟

يوسف: هوه ده اللي قاله الملاك ...أنا مبقولش الكلام ده من عندي.

ص2: بس اشعياء النبي بيقول في كتابه ان الله بنفسه بس هو اللي يقدر يخلصنا من خطايانا......(بسخرية) ...هل الطفل ده هيبقي هو الله نفسه؟؟
يوسف (يبدو عليه التفكير العميق): هو الموضوع شكله كده فعلاً.

ص2 : بصراحة الموضوع كده شكله فيه حاجة غلط.... أنت أكيد فاهم غلط أو ...أو مضحوك عليك.

يوسف: كفاية إنك تبص عالإسم اللي قاله الملاك عليه عشان تعرف إن الموضوع حقيقي ومفيهوش خداع ...الملاك قال إنه هيكون يشوع .... يشوع القائد العظيم اللي غزا أريحا في 7 أيام وأسوارها وقعت زي ما رب الجنود قال بالظبط، ومدام الطفل هيكون علي إسمه يبقي أكيد هيكون هو المخلص لشعبنا.

ص2: الكلام ده حضرتك سمعته مباشرة من الملاك؟؟

يوسف: احنا الاتنين مريم وأنا سمعناه بوداننا...... خلوا بالكوا كمان إن اشعياء النبي تنبأ إن المسيا هيولد من عذراء وهيدعي عمانوئيل الذي تفسيره "الله معنا".

ص3 : فعلاً اشعياء قال كده بس النبي ميخا برضه قال إن المسيا هيولد في بيت لحم مش في الناصرة.

يوسف: كلام حضرتك صح... ودي فرصة إني أقول لحضراتكوا إننا مسافرين عشان التعداد العام اللي أكيد سمعتوا عنه.. ورايحين بيت لحم وبالشكل ده واضح ان الطفل هيتولد هناك.

ص3: الأنبياء تنبأوا كمان بميلاد المسيا من نسل داود......حضرتك من عيلة مين بالظبط؟؟
يوسف: أنا وأم الطفل مريم من نسل داود الملك......شكراً لإستماعكم ليّ ....أنا لازم أمشي حالاً (يبدأ يستدير لينصرف فيصيح وراءه أحد الصحفيين)

ص2: سؤال أخير...أنتوا هترجعوا امتي؟؟ احنا عاوزين نشوف الطفل ده لما يتولد.

يوسف (يبتسم): أنا مش عارف الظروف هتكون ايه أو هنرجع امتي بس أنا متأكد ان ربنا معانا وهيحفظنا ....ومتأكد كمان إنكوا كلكوا هتشوفوا الطفل ده أو علي الأقل هتسمعوا عنه. (يخرج)